Basilian al ospite la presentazion dal dvd “La fabriche dai predis” di pre Antoni Beline, li de Biblioteche Civiche di Vile Zamparo, vinars ai 8 di Fevrâr aes 20.45, te suaze de rassegne Incuintris cui Autôrs, inmaneade dal Assessorât a la Culture e al Sportel pe lenghe furlane, cu la colaborazion de associazion i Viandants e de Pro Loco di Blessan.
Une ocasion par fâ cognossi la opare di pre Antoni Beline ma ancje par celebrâ la sô figure dongje dal aniversari de sô nassite.
Cognossût a Vençon, il paîs de sô famee, ancje come pre Pieri Massangat, al nas ai 11 di Fevrâr dal 1941. Ai 23 di Avrîl dal 2007 al mûr su la place di Visepente, in comun di Basilian.
La Patrie dal Friûl, Glesie Furlane e VideoTeleCarnia a vuelin memoreâlu cun chest video che al è la interviste di presentazion dal so libri che al à fat plui scjas: “La fabriche dai predis”. Te videointerviste pre Antoni al fevele in struc dai contignûts e des motivazions che lu àn puartât a scrivi il libri omonim, ritirât subit dopo de metude in onde di cheste presentazion televisive, che in chest dvd e je te version integrâl inedite.
“La fabriche dai predis” e je un diari che al ricostruìs i agns de infanzie e dal ’seminari di pre Antoni, puartant esperiencis diretis e riflessions intimis.
Il libri al fo criticât in maniere pesante di bande de jerarchie eclesiastiche pes analisis scletis che al scrivè pre Beline, ma tal stes timp al fo preseât une vore dal public pe maniere direte e la profonde umanitât che e vignive fûr di chês pagjinis.
Vie pe serade di Basilian, a intervegnaran Mauro Della Schiava e Dree Valcic, colaboradôr e diretôr da La Patrie dal Friûl, il mensîl in lenghe furlane diret par agns propit di pre Beline.
