Ai 4 di Mai e comence la cuinte edizion di IN STANT PIC, il spazi radiofonic setemanâl curât dal Progjet Integrât Culture e finanziât mediant de Leç 482/99, che ancje chest an al viôt la colaborazion dai Sportei pe lenghe furlane dal Friûl di Mieç.
Il Progjet Integrât Culture (PIC) al nas tal 1994 par promovi la culture tal teritori, creant apontaments e manifestazions tai setôrs de art, de storie, de leterature, dal spetacul. A vuê, a son 14 i Comuns che a aderissin al PIC: Basilian, Bertiûl, Cjamin dal Tiliment, Cjasteons di Strade, Codroip, Flaiban, Lestize, Merêt di Tombe, Mortean, Rivignan, Sedean, Talmassons, Teor e Vil di Vâr, che a cjapin dentri pôc sù pôc jù 60.000 abitants.
La trasmission IN STANT PIC e larà in onde ogni vinars di buinore a lis 10.30 e in repliche di sabide a lis 12.30 par vincjedôs pontadis su lis frecuencis di Radio Onde Furlane (90.00 mhz – in Friûl, 90.20|106.50 mhz in Cjargne). A prestâ la vôs al program a saran lis sportelistis di lenghe furlane dal Friûl di Mieç plui un volontari dal Servizi Civîl dal Comun di Codroip che a contaran ce che al è il PIC, cualis che a son lis gnovis scuviertis de archeologjie tal Friûl di Mieç, e nus tignaran informâts su lis manifestazions che il PIC al promôf jù pal istât e fin te sierade. La novitât di chest an al è l’intervent dal atôr Massimo Somaglino inte rubriche “Pic e peraulis” dulà che al leiarà il libri “I nons dai paîs dal Friûl di Mieç” scrit di Agnul Marie Pittana, plui cognossût come Agnul di Spere, e publicât tal Dicembar dal 2001 dal P.I.C.
Us invidìn a scoltâ IN STANT PIC.
