La Fieste di Autun a Felet in Comun di Tavagnà e presente une vore di iniziativis pe edizion 2012
Une di chestis e je la presentazion dal dvd “La fabriche dai predis di pre Antoni Beline, li de gnove Sale Comunâl “Egidio Feruglio” aes 6 e mieze di sere di Sabide ai 06 di Otubar in colaborazion cul sportel pe lenghe furlane dal comun e la Pro Loco C.I.L. Felet.
Pre Antoni Beline (cognossût a Vençon ancje come pre Pieri Massangat) al nas ai 11 di Fevrâr dal 1941. Ai 23 di Avrîl dal 2007 al mûr su la place di Visepente, in comun di Basilian. Pai 5 agns de muart dal tradutôr de Bibie par furlan, La Patrie dal Friûl, Glesie Furlane e VideoTeleCarnia a vuelin memoreâlu cun chest video che al è la interviste di presentazion dal so libri che al à fat plui scjas: “La fabriche dai predis”. Te videointerviste pre Antoni al fevele in struc dai contignûts e des motivazions che lu àn puartât a scrivi il libri omonim, ritirât subit dopo de metude in onde di cheste presentazion televisive, che in chest dvd e je te version integrâl inedite.
“La fabriche dai predis” e je un diari che al ricostruìs i agns de infanzie e dal ‘seminari di pre Antoni, puartant esperiencis diretis e riflessions intimis.
Il libri al fo criticât in maniere pesante di bande de gjerarchie eclesiastiche pes analisis scletis che al scrivè pre Beline, ma tal stes timp al fo preseât une vore dal public pe maniere direte e la profonde umanitât che e vignive fûr di chês pagjinis.
Vie pe serade di Felet, che si tignaràli de gnove Sale Comunâl “Egidio Feruglio” dal Comun aes 6 e mieze di sere di Sabide ai 06 di Otubar, a intervegnaran Dree Valcic e Mauro Della Schiava, diretôr e colaboradôr da La Patrie dal Friûl, in mensîl in lenghe furlane diret par agns propit di pre Beline.
