Ta chescj dîs si è costituide a Gurize la gnove compagnie associative clamade “Furlans dal gurizan” cul fin di dâ vôs ae Comunitât furlane de provincie di Gurize e in particolâr promovi la lenghe, la culture e la storie traviers la ricercje, la racuelte e difusion des informazions e documentazions, in colaborazion cun ents publics e privâts e ancje cu lis associazions che a àn lis stessis finalitâts.
La associazion “Furlans dal gurizan” e intint ancje aderî a organisims nazionâi e internazionâi che a vedin obietîfs simii, cul fin di organizâ cunvignis, cors e dut ce che al sedi util ae comunitât par sensibilizâ i furlans di Gurize e dal teritori a iscrivisi al gnûf sodalizi.
Si proviôt di presentâ la gnove associazion al Incuintri tradizionâl dai Furlans tal Mont che chest an si fasarà a Gurize ai 4 e 5 di Avost, par svilupâ il progjet di costituî une “cjase comune” promovint il dialic cu lis comunitâts dai furlans ator pal mont, in colaborazion cu lis istituzions e lis associazions dal teritori.
La associazion dai “Furlans dal gurizan” e je vierte a ducj chei che a intindin contribuî cu la lôr partecipazion ative ae tutele e valorizazion de Comunitât furlane di Gurize e dal so teritori.
Contats:
www.furlansdalgurizan.eu
info@furlansdalgurizan.eu
