Il 2012 si vierç pe Patrie dal Friûl cuntune grande novitât in cuviertine: tra i colaboradôrs de storiche riviste in lenghe furlane, direte di Dree Valcic, al jentre ancje Otto D’Angelo, innomenât pitôr furlan che ogni mês al ilustrarâ un teme che i letôrs a podaran aprofondî cu la leture de gnove rubriche Di bessôi. Si scomence cul “ministeri furlan de Sanitât”, midiant de interviste a Paolo Bordon che al fâs il pont sul nestri sisteme sanitari.
Il numar si vierç cuntune interviste a Arnalt Baracêt, che ancje se al à di pôc finît 80 agns al continue cun fuarce la sô bataie a pro dal Friûl. Agnul Floramo al firme une altre rubriche storiche dopo dal sucès de Cuintristorie dal Nûfcent: il 2012 al sarà l’an dai Grignei di storie. Ancje Bete di Spere e scree un gnûf spazi tra il divertent e il sureâl che za dal titul al è dut “un program”, TV – Friûl & Cjançons, la vuide ai programs televisîfs furlans, cu la sô solite (auto)ironie.
Franc Fari, innomenât neurolic internazionâl al propon a pontadis un so studi sul valôr dal libri de Bibie. E dongje des novitâts a son lis confermis, tant che il spazi su Glesie Furlane e la sô ativitât, lis rubrichis dal Friûl fûr dal Friûl; lis pagjinis internazionâls che chest an a zontin ancje une specifiche sui Ladins; la musiche; cine; culture; internet e tant altri. Tantis novitâts e riconfermis, ma simpri cun chê di volê contâ il Friûl cuntun voli furlanist.
Sul sît www.lapatriedalfriul.org e je dispobile za cualchi cerce di chest numar e te sezion “cemût abonâsi” si spieghe cemût fâ par lei ogni mês a cjase “La Patrie dal Friûl” parcè che… cuntun Friûl plui furlan tu stâs miôr ancje tu!
